"Aşgabatýylylyk" tresti
Türkmenistanyň Konstitusiýasynyň we Döwlet baýdagynyň güni mynasybetli «Morinžgeologiýa» hyzmat kärhanalarynyň toparynyň işgärleri planetanyň çykmasy iň kyn belentlikleriniň biri – Nepaldaky sekiz müňlük Annapurna (8 091 m) depesine çykdylar.
Alpinistler dagyň iň belent nokadynda sarsmaz döwletliligiň, erkiň dabaralanmagynyň we halkyň agzybirliginiň nyşany bolan mukaddes ýaşyl tuguny galdyrdylar.
Merkezi Nepalda ýerleşýän Annapurna dagy dünýäniň iň beýik daglarynyň arasynda onunjy orny eýeleýär we 1950-nji ýylda adam tarapyndan boýun egdirilen ilkinji sekiz müňlük hökmünde taryha girdi. Howa şertleriniň aşa çylşyrymlylygy we garyň süýşmek howpunyň ýokarylygy sebäpli, bu dag ulgamy çykmak üçin iň adatdan daşary künjekleriň biri hasaplanýar.
Dag sebiti alty müň metrden geçýän 16 sany belentligi öz içine alýar hem-de planetanyň iň çuňňur jülgesi bolan Kali-Gandaki bilen serhetleşýär, bu bolsa özboluşly, ýöne aşa howply landşafty emele getirýär.
Annapurna guralan ekspedisiýa «Morinžgeologiýa» holdinginiň hünärmenler toparynyň baý üstünlikler sanawynyň üstüni ýetirdi. Ozal bu toparyň tejribeli alpinistleri Ewerest, K2 (Çogori), Manaslu, Akonkagua, Ama-Dablam, Kilimanjaro, Ararat, Monblan we Matterhorn ýaly meşhur daglaryň depelerine üstünlikli çykdylar.
Ýola goýlan asylly däbe görä, planetanyň bu kynlyk bilen eýelenýän belentlikleriniň her birinde Türkmenistanyň Döwlet baýdagy hemişe belentde parladylýar.
«Morinžgeologiýa» hyzmat kärhanalarynyň topary ýurdumyzyň energetika ulgamynyň ösdürilmegine saldamly goşant goşýar. Kompaniýa «Dragon Oil (Turkmenistan) Ltd.» (BBA) kompaniýasy bilen baglaşylan uzak möhletleýin şertnamanyň çäklerinde «Çeleken» çäginde toplumlaýyn geofiziki we inženerçilik-geologik gözleg işlerini alyp barmak bilen, Türkmenistanda işjeň hereket edýär. Şeýle hem holding Malaýziýanyň «Petronas Carigali (Turkmenistan) Sdn Bhd» kompaniýasy bilen «Blok-I» şertnamalaýyn meýdançada «Uglewodorod serişdeleri hakynda» Türkmenistanyň Kanunyna we Önümi paýlaşmak hakyndaky Ylalaşyga doly laýyklykda üstünlikli hyzmatdaşlyk edýär.
Hazar deňziň şelfiniň özleşdirilmeginde uly tejribesi bolan «Morinžgeologiýa» hyzmat kärhanalarynyň topary Russiýanyň «PAO LUKOÝL», Gazagystanyň «KazMunaýGaz» paýdarlar jemgyýeti, Azerbaýjanyň «SOCAR» kompaniýasy we pudagyň beýleki dünýä liderleri ýaly öňdebaryjy halkara energetika korporasiýalary üçin ygtybarly hyzmatdaş hökmünde çykyş edýär. Nepal daglarynda gazanan bu täze hünär üstünligi kompaniýanyň sportda-da, hünär işinde-de iň belent maksatlara ýetmäge bolan ymtylyşyny ýene bir gezek subut edýär.
